إيرادات فيلم «ولاد رزق 3» في مرمى نقاد السينما بين الإشادة والتساؤلات (تقرير)

اشتد الجدال خلال الفترة الحالية بعد تصدر فيلم «ولاد رزق 3» قائمة الأعلي إيرادات، منذ طرحه في السينمات يوم 21 يونيو الجاري، ما بين النقاد وصناع السينما، خاصةً مع اهتمام المستشار تركي آل الشيخ بنشر الأخبار بشكل يومي عن الإيرادات التي يحققها الفيلم، والتي قد أثارت تعليقات البعض خاصة مع الحديث عن تحقيق فيلم «ولاد رزق 3» لأعلى إيرادات في تاريخ السينما المصرية، واعتبر البعض أن «أعلى إيراد في تاريخ السينما» أمر يرتبط بالكثير من الظروف والأمور التي تختلف من فترة زمنية لأخرى وفقا للقوة الشرائية واسعار التذاكر ،وغيرها من الأمور، وآخرون رأوا أن الفيلم يستحق هذا النجاح وأكثر وهو الأعلى بالفعل.

أسامة عبدالفتاح يعلق على كيفية حساب إيرادات الأفلام

- صورة أرشيفية

تحدث الناقد أسامة عبدالفتاح، عن كيفية حساب إيرادات الأفلام بشكلٍ عادل، من خلال منشور عبر حسابه الشخصي «فيسبوك»: «تاني.. يمكن حد يسمع، مافيش حاجة اسمها أعلى إيرادات في تاريخ السينما إلا بحسابات شديدة التعقيد مش بنعملها وما نقدرش نعملها لأننا أمة بلا قواعد بيانات ولا إحصائيات ولا معلومات صحيحة ولا جهات تحليل دقيقة ومحايدة».

وأضاف: «حسابات تراعي العدد الحقيقي للتذاكر المباعة بالفعل والسعر الحقيقي للجنيه وقت الشراء وحساب نسبة التضخم بالمقارنة بسنوات فاتت وحساب فرق الأسعار والقيمة وعدد النسخ وعدد الشاشات وعدد الأسابيع وحاجات كتير».

واستكمل «عبدالفتاح»: «ممكن جدا تكتشف إن المليون جنيه زمان قوتهم الشرائية والحقيقية أكبر من ١٠٠ مليون دلوقتي وإن اللي اشتروا تذاكر بالمليون جنيه أكتر من اللي اشتروا بال١٠٠ مليون عشان فروق الأسعار، وبالتالي فعدد مشاهدي الفيلم القديم أكتر».

واختتم الناقد أسامة عبدالفتاح حديثه قائلًا: «مسألة معقدة ما تشغلش بالك بيها.. سيب اللي يفرح يفرح وسيب اللي يكسب يكسب وربنا يرزق الجميع.. بس بلاش والنبي زياط ودوشة كتير عشان الشكل ما يبقاش وحش».

عمرو سمير عاطف: «ولاد رزق 3» دعاية للرياض

قال السيناريست عمرو سمير، عبر حسابه الشخصي «فيسبوك»: «ولاد رزق لو جاب تكلفته- وأكيد ده ها يحصل -يبقى حقق أكتر من المطلوب، ولاد رزق بالفعل نجح وحقق أهدافه دعاية عظيمة للرياض وموسم الرياض عمل مبهر وإنتاج ضخم ومستوى من الأكشن وإيقاع الناس ما شافتش زيه في أعمال عربية ومصرية قبل كده».

وأضاف «عمرو»: «ألف مبروك لكل اللي شاركوا في الفيلم ونتوقع ونتمنى المزيد من الانتاج المتميز والإبهار فيه فنانيين كتير ممكن يصنعوا أعمال عظيمة ومع انتاج رائع بالشكل ده ها يبقى تاريخ جديد لصناعة السينما في المنطقة».

أسباب نجاح فيلم ولاد رزق 3

كما تحدث الناقد عبدالله غلوش، عن أساب نجاح فيلم ولاد رزق ٣، وارتفاع إيراداته، قائلًا: «الفيلم ليه إيراداته كبيرة.. لانه ببساطة أفضل الأفلام المعروضة في موسم العيد الحالي، ورغم أنه مش كوميدي لكن جرعة الكوميديا فيه أعلى من أفلام تانية من المفترض أنها كوميدية أساسًا وتخرج منها من غير ما تبتسم مرة أو اتنين».

واستكمل «غلوش»: «الفيلم له ارضية كبيرة في الشارع بفضل نجاح الجزأين الأول والثاني، وبالتالي سقف التوقعات عند الناس كان عالي تجاه الفيلم وداخلين وهما متأكدين أنه ع الاأل مش هايكون مستواه اقل من اول جزأين، بالإضافىة إلى أن هامش الجرأة في الفيلم المتعلقة ببعض الإيحاءات والألفاظ اللي بيميل ليها جمهور موسم العيد تحديدًا».

- صورة أرشيفية

وتابع: «من ساعة ما العربيات سعرها ارتفع، واحنا بنعاني من تراجع مشاهد الأكشن ومطاردات العربيات في السينما والدراما المصرية، لدرجة أن فيه مخرجين بقوا يكتفوا بصوت الخبطة مع ريأكشن خضة في عين السواق وخلاص واحنا نتخيل أن العربية اتخبطت، وإذ فجأة لقيت فيلم مليان عربيات لكزس وبورش وجي ام سي، عمالة تتخبط وتتكسر بسبب وبدون سبب، فأكيد ده هايشبع طاقة الكبت المدفونة عندك بقالها فترة بسبب الموضوع ده».

ولاد رزق 3 - صورة أرشيفية

وأشار «غلوش» إلى أن :«الفارق الكبير في الايراد اليومي بين الفيلم واقرب منافسيه، يُثير فضول أي حد عشان يدخل الفيلم ويشوف ايه السر..الرقم يخض لو اتعمل قصاد أفلام أبطالها وجوه جديدة أو مغمورة، فما بالك قصاد أفلام ابطالها محمد إمام وأحمد فهمي وخالد النبوي، الزخم والهيصة حوالين الفيلم، والميزانية المصروفة للدعاية له ع السوشيال ميديا لدرجة أن في صفحات غير متخصصة في الفن بتكتب اشعار عنه، ونسبة مش قليلة ومش كبيرة في نفس الوقت داخلين الفيلم بسبب إعلان لعيبة الأهلي، ونسبة مش قليلة ومش كبيرة في نفس الوقت داخلين الفيلم عشان يعرفوا كريم عبدالعزيز بيعمل ايه فيه؟.

ماذا حقق أبطال فيلم ولاد رزق 3؟

واختتم«غلوش»: «ع الهامش.. أحمد عز بقيت تتفرج على أعماله وانت مطمئن أنه في هامش من الجودة مش هينفع يقل عنها أبدا، فرحان لعمرو يوسف لانه كان بيعاني من سوء طالع وسوء حظ غريب الفترة الاخيرة، بس ربنا انصفه في العيد الصغير والكبير، ونيكول سعفان ظهرت في ٤ ثواني فقط في الفيلم، بس تخرج من السينما والمشهد معلق معاك وتبتسم كل ما تفتكر، نوران ماجد (رغدة) وجه مبشر، صوتها مميز والكاميرا بتحبها وهايكون لها مستقبل كبير، واسر ياسين وعلي صبحي إضافة كبيرة للفيلم وعوضوا غياب الفيشاوي وداوود واكتر كمان، منبهرتش بمشاهد مطاردات العربيات، اد ما انبهرت بالمشهد اللي الشايب مشي فيه ع الميه بالمتوسيكل، احمد الرافعي من المفاجأت الحلوة في الفيلم وكالعادة لازم يسيب بصمة في أي عمل يشارك فيه حتى ولو دور صغير، وعشان بحب نسرين أمين مش هاقول رأيي في دورها، وعشان بحب أسماء جلال مش هاقول رأيي في فساتينها».

اقرأ أيضًا :

إجمالي إيرادات تاريخي لـ فيلم ولاد رزق 3 في 10 أيام عرض.. بطولة أحمد عز

تركي آل الشيخ يرد على المشككين في إيرادات «ولاد رزق 3» القياسية.. ماذا قال؟

2024-06-22T09:10:26Z dg43tfdfdgfd